Defektuzko Albistea

Kontserben bidea

Itsasoak mantentzen du, hein batean, Debabarreneko nortasunaren oinarria. Eta, alderantziz ere, eskualdeak itsasoko bitxirik onenak kontserbatzen jakin izan du. Mutrikuko kontserbategiotan aurkituko dituzu.

Entrebista: "Egoera onena izan ez arren, Zizzon kontserben kalitatea dugu helburu"

Debabarrenak asko du eskaintzeko; asko eta askotarik. Mendi eta belardi berdeez, hirigune xarmant eta tradiziozkeaz gain, itsasoa eta kostaldea dira eskualdearen bereizgarrietako bat, dudarik gabe.

Herri arrantzaleen tradizioak bizi-bizirik jarraitzen du milurteetan zehar eta, egungo egoera samurregia izan ez arren, euskal portuetako produktuek kalitate gorenekoak izaten jarraitzen dute. Horren adibide da Mutrikuko kontserba industria.

Oraingoan, Zizzo Billante kontserbategiko zuzendariarekin izan gara, belaunaldi askotako lanari buruz berriketan.



kontserba1.jpg
kontserba1.jpg
Ze produktu eskaintzen dira Zizzo-n?

Antxoa eta hegaluzea, gehien-gehienean; antxoa semi-kontserban. Horrez gain, atuna eta kontserbako izokina ere saltzen dugu.

1912tik martxan dagoen beste enpresa baten zatiketatik sortu ginen gu. Gure aitona Calogero Billante zen. Zizzo Billante izenpean, berriz, 1980tik gabiltza merkatuan.

Nola banatzen dituzue zuen produktuak?

Probintzietako ordezkarien bidez. Exportaziorako ere, beste ordezkari bat badugu Italian. Gure salmenta ez dago Euskal Herrira zuzendua, baina hemen ere gustuko dituzte gure jakiak. Hori dela-eta, gure Mutrikuko egoitzara datozenei zuzenean saltzen dizkiegu produktuak.

Asko aldatu al dira kontserbagintzako produkzio-moduak?

Gure produkzioa ahalik eta automatizatuena dago, baina eskulana behar-beharrezkoa da gure langintzan. Hala, 30 langile inguru ditugu horretarako, egun.

kontserba2.jpg
kontserba2.jpg
Kontserbagintza sektorea zabala al da Debabarrenan?

Mutrikuko bost enpresok soilik osatzen dugu eskualdeko sektorea.

Eta, egun, ze egoeratan dago kontserbagintza?

Egiari zor, egoera ez da oso ona. 3 urte daramatzagu antxoarik gabe, etekinik handiena ematen digun arrainik gabe, alegia. Horrez gain, euskal kontserbagintza ez da lehiakorra galiziarrekin, hego-amerikarrekin, ... konparatuz.

Eta etorkizunera begira, zer?

Etorkizuna ez dugu oso oparo ikusten, egia esan behar bada. Antxoaren afera konpontzen ez bada, egoera belztuko zaigu, ziur. Halere, arazoa orokorra da.

Egoera ez da onena izango, baina zuen produktuak onak izaten jarraituko dute, ezta?

Dudarik gabe; gure produktuen kalitatea oso ona da. Arazoa prezioan dago, errentagarritasunean. Gure aldetik ahalik eta produktu hoberena sortzeko lan egiten dugu, azken produktuaren kalitate gorena bermatuko duten lehengai eta produkzio metodoekin.

Hartara, gure produktua erdi-goi mailako helburuko erosleari begira egina dago. Detailera egiten dugu lan. Gure banaketa esparrua ez da marka handienen parekoa, ez baitugu marka zuriekin lan egiten. Zizzon kontserben kalitatea dugu helburu.

Albisteak